Mbrojtja e Thaçit: Të deklarohet se hetimet për trafikim organesh kanë përfunduar

Avokati i ish presidentit të Kosovës Hashim Thaçi ka kërkuar nga trupa gjykuese në Hagë të deklarojë që hetimet për trafikim organesh kanë përfunduar. Këtë fillim jave po mbahet seanca e radhës gjyqësore ndaj 4 ish krerëve të UÇK-së.

Ish Krerët e Ushtrisë Çlirimtare të Kosovës kanë dalë këtë të hënë përpara Gjykatës Speciale në Hagë në seancën e radhës gjyqësore.

Në nisje të seancës, avokati i ish presidentit Hashim Thaçi, Gregory Kehoe ka kërkuar nga trupi gjykues që të deklaronte se hetimet lidhur me çështjen e trafikimit të organeve kanë përfunduar.

Avokati ka përmendur disa artikuj të botuar gjatë ditëve të fundit në media evropiane, ku zyrtarë të qeverisë në Rusi kanë pretenduar se udhëheqësit e UÇK-së janë të përfshirë në trafikim organesh.

Duke thënë që kjo është krejtësisht e pavërtetë, avokati ka deklaruar se gjykata duhet të lëshojë një njoftim, ku theksohet se kjo çështje nuk ka të bëjë me trafikim organesh.

Lidhur me shqetësimet e mbrojtjes së Thaçit ka reaguar prokurori Matt Halling i cili kërkoi që shqetësimet të parashtrohen me shkrim.

Seanca po vazhdon me dëshminë e dëshmitarit të gjashtëmbëdhjetë të Zyrës së Prokurorit të Specializuar i cili po dëshmon në fshehje të identitetit.

Hashim Thaçi, Kadri Veseli dhe Rexhep Selimi janë të pranishëm në gjykatë, ndërsa Jakup Krasniqi po merr pjesë në seancë përmes aplikacioneve online nga qendra e paraburgimit.

4 ish krerët e UÇK ndodhen në qendrën e paraburgimit në Hagë prej nëntorit të vitit 2020.