McKennie rinovon me Juventusin deri në 2030, rritje page dhe rol kyç për sezonin e ardhshëm

Në një periudhë të vështirë për Juventusin, me vetëm dy fitore në tetë ndeshje dhe eliminim nga Liga e Kampionëve përballë Galatasaray, klubi bardhezi ka marrë një lajm pozitiv nga fusha.

Weston McKennie ka rinovuar zyrtarisht kontratën me Juventusin deri më 30 qershor 2030. Mesfushori amerikan, i ardhur në Torino në vitin 2020 nga Schalke 04, ka qenë një nga pikat më të forta të skuadrës nën drejtimin e Luciano Spallettit, duke realizuar tetë gola dhe shtatë asiste këtë sezon, pavarësisht spekulimeve për largimin e tij gjatë verës.

27-vjeçari do të përfitojë edhe një rritje të ndjeshme page, duke kaluar nga 2.5 milionë euro neto në sezon në 4 milionë euro plus bonuse. Me mbi 220 paraqitje me fanellën bardhezi, ku ka shënuar 26 gola dhe ka dhënë 26 asiste, McKennie është shndërruar në një element të pazëvendësueshëm falë fleksibilitetit dhe paraqitjeve të qëndrueshme.

Klubi theksoi se rinovimi është fryt i performancave të nivelit të lartë të lojtarit, i cili ka fituar besimin e trajnerit dhe zemrat e tifozëve. Në një mesazh të publikuar në rrjetet sociale, McKennie u shpreh: “Jam shumë i lumtur që kam rinovuar kontratën dhe që do të vazhdoj të jem me ju. Shihemi në fushë.”