Policia e Tiranës ka zbardhur dhe ka dokumentuar 62 raste të përndjekjeve online, të cilat janë kryer nga një 34-vjeçar, i cili vuan dënimin në një burg të Francës.
Në bazë të bashkëpunimit me autoritetet franceze, u bë e mundur që të identifikohej personi që kryente përndjekje online të vajzave në Shqipëri.
Shtetasi Fabjan Dodaj, ndërhynte në profilet e rrjeteve sociale (kryesisht Tik Tok dhe Instagram) të shtetaseve të ndryshme dhe pasi merrte fotografi nga profilet e tyre, i publikonte ato në profile false të krijuara prej tij, duke vendosur përshkrime denigruese.
Autori më pas i shantazhonte këto shtetase, duke i kërkuar fotografi dhe video intime në këmbim të fshirjes së materialeve të publikuara prej tij.
Materialet në ngarkim të tij i kaluan prokurorisë për veprime të mëtejshme.
“Gjatë hetimeve të kryera, janë siguruar prova të mjaftueshme që krijojnë dyshimin se shtetasi F. D., 34 vjeç, i cili aktualisht vuan dënimin në një burg në Francë për veprat penale “Vjedhje me pasoja të rënda” dhe “Komplot kriminal”, parashikuar nga Kodi Penal Francez, ka konsumuar veprat penale “Falsifikimi kompjuterik”,
“Ndërhyrja në të dhënat kompjuterike”, “Perndjekja”, dhe “Ndërhyrje të padrejta në jetën private”, parashikuar nga nenet 86/a, 121, 121/a, 293/b të Kodit Penal.
Pas identifikimit të interceptimeve kompjuterike që pulsonin nga burgu “Lyon Cobras”, në Francë, është bashkëpunuar me Interpol Tirana dhe autoritetet Franceze dhe është ushtruar kontroll në qelinë ku ndodhet shtetasi F. D., dhe gjatë kontrollit është gjetur dhe sekuestruar aparati celular që ky shtetas përdorte për veprimtarinë kriminale”, thuhet në njoftimin e policisë.
LEXONI GJITHASHTU:
- Nga përndjekja te mashtrimi e dhuna, arrestohen 5 persona në Tiranë
- Lanë djalin autik në makinë i cili gjeti vdekjen, arrestohet çifti shqiptar në Greqi
