“Më fal”- Avokati serb homazhe në varrin e Blerina Jasharit: Ti jeton përgjithmonë

Cedomir Stojkoviç, përfaqësuesi ligjor i poltikanit serb, Nikola Sanduloviç, ka qenë prezent në kompleksin “Adem Jashari” në Prekaz, këtë të premte, ku ka bërë homazhe në nder të viktimave të luftës në Kosovë.

Stojkoviç ka lënë një buqetë me lule dhe një letër mbi varrin e Blerina Jasharit.

Në mesazhin e lënë, të shkruar në gjuhën shqipe, angleze dhe serbe, avokati kërkon falje për vrasjen e vogëlushes.

“Urrejtja vdes. Ti jeton përgjithmonë. Një mijë lot për një mijë vjet paqe. Dhe miliona shpresa dhe ëndrra. Të cilat fillojnë me fjalën ‘Më fal’”, shkruhet në letër.

Pas kësaj, në një prononcim për mediat, Stojkoviç është shprehur se ditën e nesërmë, pavarësisht presioneve, ai do të kthehet në Beograd.

“Nesër do të shkoj në Beograd dhe nuk kam arsye të frikësohem. Ne e kemi për obligim të bëjmë se çka është e drejtë dhe çka është e duhur!”- ka shtuar ai.

Shkak për vizitën në Prekaz, ka qenë arrestimi i opozitarit serb Nikola Sanduloviç nga shërbimi sekret BIA, pasi zhvilloi homazhe mbi varrin e Blerina Jasharit. Avokati zgjodhi të sfidonte atë që ai e quan regjimi fashist në Serbi, duke kryer të njëjtin gjest human mbi varrin e një fëmije të vrarë në luftë.

LEXONI GJITHASHTU:

• U arrestua se vendosi lule në varrin e shqiptares, lirohet nga burgu politikani serb
• “S’më intereson”- Avokati serb: Kam të drejtë të nderoj familjen e Adem Jasharit