Me sytë nga autobusi, prej 5 ditësh transporti në kaos, Bashkia e Tiranës s’ndërhyn

Në pritje me sytë nga rruga. Kjo është situata në stacionet e autobusëve në kryeqytet.

Prej pesë ditësh në rrugët e Tiranës numri i autobusëve është përgjysmuar ndërsa qytetarët presin nëpër stacione.

 ‘Po bëjmë nja dy-tre ditë sikur po presim shumë”, shprehet një qytetar.

“Studenti vonohet shumë, përditë një avaz, një orë, një orë e gjysmë”, ankohet një tjetër.

Pritjet e gjata në stacion, grumbullojnë edhe më shumë qytetarë brenda autobusëve. Në kushte të tilla, vështirë të kërkohet ruajtja e distancës dhe respektimi i masave anticovid.

“Kërkojnë pandemi, Ku është pandemia, me 200 veta në autobus. Të merr frika me dal nëpër stacione, kemi një stres të paparë”, thotë një qytetare.

Unioni i Transportit Publik pret përgjigje nga Bashkia Tiranë për plotësimin e kërkesave.

Bashkia Tiranë ende nuk ka marrë një vendim, sipas tyre situata po ndiqet dhe do ketë një zgjidhje konform kontratës me operatorët e transportit.

Nuk dihet sa do vazhdojë pritja e as se kur do ndërhyjë pushteti lokal por qytetarët kërkojnë një zgjidhje sa më parë.