Kryetari i Partisë Demokratike të Kosovës, Memli Krasniqi, ka deklaruar se situata në Kuvend zhbllokohet në momentin që Lëvizja Vetëvendosje ndryshon kandidatin për kryeparlamentar.

Duke hyrë në objektin e Kuvendit të dielën për vazhdimin e seancës konstituive, ai u shpreh skeptik se sot do të zgjidhen trupat e organit kryesor legjislativ.

Deputetët e PDK-së kanë votuar kundër zgjedhjes së Albulena Haxhiut si kryeparlamentare, në katër përpjekje të saj për të marrë këtë post.

E njëjta në katër tentime ka marrë vetëm 57 vota pro, nga 61 sosh sa janë të nevojshme. Kundër saj po votojnë edhe deputetët e LDK-së dhe AAK-së, ndërkaq tre deputetët e Nisma Socialdemokrate po abstenojnë.