Mesazhet e Ramës për Kurtin nga Prishtina: Politika e jashtme përdoret për vota

Kryeministri Edi Rama udhëtoi këtë fillim jave drejt Prishtinës për të marrë pjesë në kremtimet për 25 vjetorin e çlirimit të Kosovës.

Në konferencën ndërkombëtare kushtuar këtij përvjetori të titulluar “Rugova dhe Perëndimi” kreu i ekzekutivit u tregua i ashpër me qeverinë e drejtuar nga Albin Kurti, të cilin zgjodhi të mos e takonte, por t’i përcillet disa mesazhe në raportet me Beogradin zyrtar.

Rama kërkoi që Kosova të vijojë përpara dhe të mos përdorë politikën e jashtme si politikë të brendshme për të marrë vota.

“Ne jemi në një proces ku thellohet qasja ndaj politikës së jashtme si politikë e brendshme dhe shfrytëzimi i platformave të komunikimit jashtë si tribuna për të marrë vota këtu. Ky konfrontimi si macja me miun në tavolinë, këto mbledhjet për t’u mbyllur brenda me orë vetëm për të dalë pas mbledhjes e për të thënë sa fortë i qëndrova unë tjetrin, këto nuk çojnë askund. Kosova duhet t’i tregojë targën Serbisë e të iki përpara dhe Serbia të bëjë çfarë të dojë pastaj”, tha mes të tjerash Rama gjatë fjalës së tij.

Përpara panelit dhe pjesëmarrësve, Rama vlerësoi edhe rolin e figurën e ish-presidentit Ibrahim Rugova në formimin e shtetit të Kosovës.

Për Ramën, Ballkani ka një shans historik për të çuar përpara dialogun. Gjatë qëndrimit në Prishtinë, kryeministri Rama u takua edhe me presidenten Vjosa Osmani.

LEXONI GJITHASHTU:

• Përplasje me Kurtin? Si përgjigjet Vjosa Osmani
• Kurti: Nuk besoj që ekzistojnë dallime të patejkalueshme me Osmanin dhe të tjerët