Meta akuzon Autoritetin e Dosjeve për 6 vepra penale

Kreu i Partisë së Lirisë, Ilir Meta ka kallëzuar Autoritetin e Dosjeve. Ai ka sqaruar më herët se kallëzimi është bërë për shkeljet e rënda dhe të qëllimshme që i ka bërë ky institucion, ligjit organik për dosjet e ish-Sigurimit të Shtetit.

Sot, në një deklaratë për mediat, Meta renditi 6 vepra penale, që sipas tij ka kryer Autoriteti i Dosjeve.

1. Shpërdorim detyre
2. Falsifikim i dokumenteve shtetërorë
3. Falsifikim kompjuterik
4. Falsifikim vulave, stampave ose formularëve
5. Përhapja e informatave të rreme që përhapin panik
6. Zbulimi i akteve ose të dhënave sekrete

Sipas Metës, të gjitha veprat penale të listuara më sipër janë kryer në bashkëpunim.

“Autoriteti i Dosjeve ka shkelur ligjin për llogari të kryeministrit Edi Rama,” – tha kreu i Partisë së Lirisë, i cili theksoi gjithashtu se institucioni ka prodhuar gjeneralitete të rreme.

Për Metën, Autoriteti i Dosjeve ka nxjerrë konkluzione shteruese pa kryer kurrfarë hetimi objektiv duke marrë 7 vendime në 24 orë, kur me procedurë normale do të duheshin 6 muaj.

Ish-presidenti Ilir Meta është politikani i lartë me inicialet I.M që prentendohet se figuron në dosjet e Sigurimit të Shtetit.

Autoriteti i Dosjeve e përmend atë me emër dhe mbiemër në dokumentin që i drejtoi Kuvendit ku i kërkon gjithashtu të ndryshojë ligjin, pasi sipas tij nuk mund të verifikohen figurat politike të verifikuara një herë nga komisioni Mezini e Bezhani.

LEXONI GJITHASHTU:

• Meta kallëzon Autoritetin e Dosjeve, Balla: Prokuroria të mos i bëhet strehë
• Ilir Meta kallëzon Autoritetin e Dosjeve: Në shërbim të shantazhit politik