Meta përgëzon Kurtin: I përgatitur dhe konstruktiv në bisedimet me Vuçiçin

Kreu i Partisë së Lirisë Ilir Meta ka reaguar në lidhje me bisedimet e mbajtura në Bruksel mes kryeministrit të Kosovës Albin Kurti dhe presidentit serb Aleksandër Vuçiç.

Përmes një postimi në facebook, Meta shkruan se takimi i djeshëm ishte një mundësi e mirë për të hedhur një hap për normalizimin e marrëdhënieve mes dy vendeve.

Kreu i PL e përgëzon Kurtin për përgatitjen dhe qasjen konstruktive që takoi në dialog.

“Mbrëmë në Bruksel ishte një mundësi e mirë për të hedhur një hap të qëndrueshëm e pozitiv drejt njohjes së ndërsjelltë, paqes dhe integrimit europian të Kosovës dhe Serbisë.

Teksti zyrtar i marrëveshjes pati elemente që meritojnë vlerësim pozitiv, përderisa palët zotohen që të udhëhiqen nga synimet e parimet e përcaktuara në Kartën e Kombeve të Bashkuara, sidomos ato për barazinë sovrane të Shteteve, respektimin e Pavarësisë, autonomisë dhe integritetit territorial të tyre, si dhe të Drejtën për Vetëvendosje.

E përgëzoj kryeministrin e Kosovës, z. Kurti, që kishte shkuar i përgatitur dhe konstruktiv.

Shpresoj që edhe Presidenti i Serbisë ta gjejë guximin e të nënshkruajë sa më shpejt, sepse koha kurrë nuk mund të kthehet pas.

E ardhmja e rajonit tonë nuk është te skemat dhe taktikat si puna e “Ballkanit të Hapur”, as te “tërheqjet e veshëve” por te marrëveshjet e drejta, transparente, që konkretizojnë integrimin europian dhe i hapin rrugën fqinjësisë së mirë, ku asnjë fqinj nuk e dominon tjetrin”, shkruan Meta.

LEXONI GJITHASHTU:

• Takimi Kurti-Vuçiç në Bruksel, qeveria e Kosovës zbardh detaje: Ja çfarë u ra dakord
• Takimi në Bruksel, Kurti: Isha i gatshëm të nënshkruaj propozimin e BE, Serbia jo
• Andi Bushati: Çfarë po na fsheh Albin Kurti me Aleksandër Vuçiçin