Takimi Kurti-Vuçiç në Bruksel, qeveria e Kosovës zbardh detaje: Ja çfarë u ra dakord

Qeveria e Kosovës ka zbuluar detaje në lidhje me takimin e të hënës në Bruksel mes kryeministrit Albin Kurtit dhe presidentit serb Aleksandër Vuçiç.

Përmes një njoftimi zyrtar qeveria e Kosovës bën me dije se në takimin trelateral u ra dakord që teksti i Propozimit të BE-së të mbetet i pandryshuar, edhe pse Serbia nuk u tregua e gatshme për ta firmosur.

Në deklaratë theksohet gjithashtu se kryeministri Kurti shprehu gatishmërinë për nënshkrimin e marrëveshjes bazë nëpërmjet Kosovës dhe Serbisë, por kjo u refuzua nga pala serbe.

“Para fillimit të takimit zyrtar me Përfaqësuesin e Lartë të BE-së, Borrell, Kryeministri Kurti realizoi një takim me zëvendës Ndihmës Sekretarin e Shteteve të Bashkuara për Çështje Evropiane dhe Euroaziatike dhe njëherësh të dërguarin e posaçëm të Shteteve të Bashkuara të Amerikës për Ballkanin Perëndimor, Gabriel Escobar. Me të bisedoi për pritjet nga takimi i sotshëm. Kryeministri e falënderoi z. Escobar për mbështetjen dhe angazhimin e Shteteve të Bashkuara të Amerikës në procesin e dialogut.

Gjatë ditës, pas takimit bilateral me Përfaqësuesin e Lartë, Borrell, dhe emisarin e BE-së Miroslav Lajçak, u zhvillua takimi trilateral.

Kryeministri Kurti shprehu gatishmërinë për nënshkrimin e Marrëveshjes Bazë ndërmjet Kosovës dhe Serbisë, ashtu siç është propozuar nga Bashkimi Evropian dhe mbështetur nga Gjermania, Franca, Italia dhe Shtetet e Bashkuara të Amerikës. Mirëpo, pala serbe e refuzoi nënshkrimin.

Në takimin trilateral, u dakordua që teksti i Propozimit të BE-së të mbetet i pandryshuar, edhe pse Serbia ende nuk është treguar e gatshme për ta nënshkruar. Palët do të fillojnë bisedimet për planin e zbatimit. Ky plan duhet të përmbajë detaje konkrete dhe të jetë gjithëpërfshirës, të ofrojë efektivitet në zbatim dhe të jetë i sekuencuar në mënyrë të balancuar.

Marrëveshja e arritur mbrëmë është mes palëve që e njohin njëra-tjetrën si të barabarta, dhe është arritur mbi bazën e respektimit të barazisë sovrane të shteteve, respektimit të pavarësisë, autonomisë dhe integritetit territorial të tyre. Marrëveshja, mes tjerash siguron edhe njohjen e ndërsjellë të dokumenteve dhe simboleve shtetërore mes Kosovës dhe Serbisë, vendosjen e misioneve të përhershme si dhe garanton se asnjëra palë nuk e përfaqëson apo vepron në emrin e tjetrës në sferën ndërkombëtare. Me këtë marrëveshje, Serbia po ashtu obligohet të mos pengojë apo kundërshtojë anëtarësimin e Republikës së Kosovës në cilëndo organizatë ndërkombëtare”, thueht në njoftimin e qeverisë së Kosovës.

LEXONI GJITHASHTU:

• Takimi në Bruksel, Kurti: Isha i gatshëm të nënshkruaj propozimin e BE, Serbia jo
• Andi Bushati: Çfarë po na fsheh Albin Kurti me Aleksandër Vuçiçin