Mijëra njerëz protestuan sonte në Stamboll për arrestimin e kryetarit të qytetit, Ekrem Imamoglu, pavarësisht ndalimit katër-ditor të demonstratave në qytet, raporton AP.

Protestat po zhvillohen për natën e dytë radhazi dhe sonte në to mori pjesë edhe kryetari i kryeqytetit turk, Ankara, Mansur Yavas, i cili u bëri thirrje forcave opozitare të bashkohen “kundër padrejtësisë”.

Policia ndaloi një grup protestuesish që u përpoqën të bënin rrugën për në sheshin qendror Taksim të qytetit.

Presidenti turk Rexhep Tajip Erdogan tha sot se partia kryesore opozitare, Partia Popullore Republikane (CHP), anëtare e së cilës është Imamoglu, po përpiqet të mbulojë gabimet e veta dhe të mashtrojë njerëzit me “teatër”.

Imamoglu u arrestua të mërkurën si pjesë e një hetimi për rastet e dyshuara të korrupsionit dhe terrorizmit, duke shkaktuar pakënaqësi të gjerë në mesin e opozitës, e ndjekur nga protesta në Stamboll dhe qytete të tjera kundër vendimit.

LEXONI GJITHASHTU:

• Arrestohet për korrupsion kryetari i bashkisë së Stambollit, kundërshtar i Erdogan
• Erdogan kërkon rikthimin e negociatave për anëtarësimin e Turqisë në BE