Ministri i Drejtësisë në takim me përfaqësuesit e KiE: Shqipëria me përqindjen më të lartë të paraburgimit, duhet ndërhyrje në ligj

Ministri i Drejtësisë Besfort Lamallari në një takim me përfaqësues të Këshillit të Evropës këtë të enjte ka vënë në fokus problematikën e paraburgimit në Shqipëri, duke pranuar se vendi ynë mban një nga përqindjet më të larta në Evropë.

Takimi u zhvillua në kuadër të konferencës së nivelit të lartë me temë “E drejta për liri dhe siguri personale nga Strasburgu te zbatimi në nivel kombëtar”, e organizuar nga Ministria e Drejtësisë, me pjesëmarrjen e përfaqësuesve të institucioneve evropiane dhe ekspertëve të drejtësisë.

Në këtë konferencë morën pjesë Gianluca Esposito, Drejtor i Përgjithshëm për të Drejtat e Njeriut dhe Sundimin e Ligjit në Këshillin e Evropës, Nicola Lettieri, Zëvendësprokuror i Përgjithshëm në Gjykatën e Lartë të Kasacionit të Italisë, si dhe Theo Byl, gjyqtar në Gjykatën e Apelit të Antwerp në Belgjikë.

Gjatë fjalës së tij, ministri Lamallari theksoi se përdorimi i masës së paraburgimit përbën një nga sfidat më të ndjeshme për sistemin e drejtësisë në vend.

“Për fat të keq, Shqipëria vazhdon të mbajë një nga përqindjet më të larta të paraburgimit në Europë. Aktualisht, rreth 58% e personave në institucionet penitenciare janë të paraburgosur, ndërsa kohëzgjatja mesatare e paraburgimit është 253 ditë, krahasuar me 155 ditë në vendet evropiane”, deklaroi ministri i Drejtësisë.

Sipas tij, kjo situatë lidhet me një politikë penale të ashpër, nga e cila Shqipëria duhet të distancohet në kuadër të procesit të integrimit evropian, përmes rishikimit të Kodit Penal dhe Kodit të Procedurës Penale, në përputhje me standardet e Bashkimit Evropian dhe Konventën Evropiane për të Drejtat e Njeriut.

Në konferencë u prezantuan gjithashtu dy raporte të përgatitura nga ekspertë ndërkombëtarë për llogari të Këshillit të Evropës, të cilat përmbajnë gjetje dhe rekomandime për përmirësimin e kuadrit ligjor penal dhe procedural penal në Shqipëri.