Ministri i Jashtëm takohet me Hashim Thaçin në Hagë: Mbresëlënëse kurajo e tij

Ministri për Evropën dhe Punët e Jashtme, Igli Hasani është takuar këtë të mërkurë në Hagë me ish-presidentin e Kosovës, Hashim Thaçi.

Hasani në një deklaratë për media bën me dije se presidenti Thaçi ishte në gjendje të mirë shëndetësore dhe i palëkundër se e drejta do të triumfojë.

Hasani shton se i përcolli ish-presidentit urimet më të mira dhe mbështetjen e drejtuesve të lartë të qeverisë dhe shtetit shqiptar.

“Sot në Hagë, u takova me Presidentin Hashim Thaçi.

E gjeta në gjendje të mirë shpirtërore, oprimist dhe me besim tëpalëkundur që e drejta do të triumfojë.

Ishte vërtet mbresëlënëse kurajo e tij, ekuilibri i brendshëm, qetësia e kthjelltësia e vizionit që ka për të ardhmen.

I vetëdijshëm se proceset gjyqësore janë një maratonë me të përpjeta e tatëpjeta. Garën e fiton ai që është i përgatitur psikologjikisht.

I përcolla zotit Thaçi urimet më të mira të drejtuesve më të lartë të qeverisë dhe të shtetit, të Kryeministrit Edi Rama dhe kolegëve të tjerë, si dhe sigurinë që, ashtu si më parë, mbështetja jonë nuk do t’i mungojë në asnjë rast dhe për asgjë.

Populli shqiptar nuk i harron as përpjekjet, as sakrificat e bijve të tij, ashtu si dje në luftë edhe sot në paqe.

E informova presidentin për zhvillimet më të fundit në vendin tonë, por edhe ato në rajon, si dhe përpjekjet e pa kursyera nga ana jonë për paqen, stabilitetin dhe zhvillimin.

Diplomacia shqiptare, ashtu si dhe më parë, do të ngulë këmbë në zbatimin e standardeve për një proces gjyqësor të hapur e transparent, në respektim të plotë të të drejtave të njeriut sipas konventave ndërkombëtare.

Një mbresë e pashlyeshme për mua si ministër i jashtëm i Republikës së Shqipërisë, por edhe por edhe si qytetar dhe admirues i përpjekjes së Haxhim Thaçit dhe të gjithë atyre burrave, që janë brenda në këtë gjykatë për lirinë e Kosovës”, tha Hasani.

LEXONI GJITHASHTU:

• Thaçit i ikën avokatët, flet i vëllai: Pamundësi financiare për të mbuluar kostot
• U tërhoqën nga mbrojtja, avokati: Kosova ka detyrim të financojë mbrojtjen e Thaçit