Ministri izraelit: Do të ndërtojmë shtet hebre izraelit në Bregun Perëndimor

Ministri i Mbrojtjes i Izraelit, Israel Katz, ka bërë një deklaratë të fortë duke premtuar ndërtimin e një “shteti hebre izraelit” në Bregun Perëndimor, një territor të pushtuar që ka qenë në qendër të tensioneve mes Izraelit dhe palestinezëve për dekada.

Katz bëri këto komente një ditë pas njoftimit të Qeverisë izraelite për krijimin e 22 vendbanimeve të reja në këtë territor.

Vendbanimet izraelite në Bregun Perëndimor, të cilat konsiderohen si një pengesë e madhe për arritjen e një paqeje afatgjatë, janë dënuar vazhdimisht nga Kombet e Bashkuara dhe cilësohen të paligjshme sipas ligjit ndërkombëtar. Vendimi i Qeverisë izraelite është përballur me kritika të ashpra ndërkombëtare, përfshirë nga shumë shtete dhe organizata të drejtat e njeriut.

Katz i quajti këto veprime si një “përgjigje të vendosur” ndaj organizatave që, sipas tij, po përpiqen të dëmtojnë dhe dobësojnë kontrollin izraelit mbi këtë territor. Ai gjithashtu dërgoi një mesazh të fortë për presidentin francez, Emmanuel Macron, dhe partnerët e tij ndërkombëtarë, duke deklaruar:

“Kjo është një përgjigje e vendosur ndaj organizatave terroriste që po tentojnë të dëmtojnë dhe dobësojnë kontrollin tonë ndaj kësaj toke dhe po ashtu është një mesazh i qartë për presidentin Macron dhe bashkëpunëtorët e tij: ata do të njohin në letër shtetin palestinez, por ne do të ndërtojmë, këtu, në këtë tokë, një shtet hebre izraelit,” tha Katz. Ai shtoi se çdo përpjekje për të njohur një shtet palestinez do të jetë e kotë: “Ajo letër do të hidhet në koshin e plehrave të historisë dhe shteti i Izraelit do të lulëzojë dhe përparojë.”

Katz bëri këto komente gjatë një vizite në vendbanimin Sa-Nur, një prej vendbanimeve izraelite në veri të Bregut Perëndimor, që u evakuua në vitin 2005 si pjesë e tërheqjes izraelite nga Gaza. Izraeli e ka pushtuar Bregun Perëndimor që nga Lufta e Gjashtë Ditëve në vitin 1967.

LEXONI GJITHASHTU:

• Zbulohet takimi i fshehtë Arabi Saudite-Iran, mesazhi i arabëve: Shmangni luftën
• Von der Leyen: Evropa duhet të forcojë mbrojtjen, të pranojë Ukrainën në BE