Ministri izraelit i Mbrojtjes niset drejt Uashingtonit për bisedime me SHBA-në

Ministri i Mbrojtjes i Izraelit, Israel Katz, pritet të arrijë sot në Uashington për takime me Sekretarin amerikan të Mbrojtjes, Pete Hegseth, dhe zyrtarë të lartë të Pentagonit.

Tema kryesore e bisedimeve do të jetë çështja e Iranit, si dhe një sërë sfidash të tjera në fushën e armatimit dhe sigurisë strategjike.

Pete Hegseth, një nga figurat kyçe në administratën Trump për politikën ndaj Iranit dhe konfliktit në Jemen, do të luajë një rol të rëndësishëm në diskutimet që pritet të përqendrohen gjithashtu edhe në sfidat rajonale dhe bashkëpunimin ushtarak.

Tradicionalisht, vizitat e ministrave izraelitë të mbrojtjes në Uashington shërbejnë për të siguruar vazhdimësinë e mbështetjes amerikane dhe superioritetin teknologjik ushtarak të Izraelit mbi kundërshtarët rajonalë. Izraeli ka kërkuar furnizime shtesë me avionë luftarakë të avancuar, përfshirë F-35 dhe F-15EX, si dhe avionë për furnizim me karburant në fluturim KC-46, si dhe një stok të qëndrueshëm municionesh dhe bombash ajrore për operacionet në fronte të ndryshme.

Në të kaluarën, SHBA-ja ka forcuar mbrojtjen e Izraelit duke stacionuar anije luftanije, si dhe bateri antimissile Patriot dhe THAAD në dhe përreth territorit izraelit, në përpjekje për të neutralizuar kërcënimet ajrore nga armiqtë.

Sipas burimeve diplomatike, Israel Katz do të kërkojë gjithashtu që administrata Trump të mbajë një qëndrim të fortë dhe të pandryshuar ndaj Iranit, duke rritur presionin për të parandaluar përparimin e programit bërthamor iranian dhe ndikimin e Teheranit në Lindjen e Mesme.

LEXONI GJITHASHTU:

• Diskutoi shkarkimin e kryetarit të Rezervës Federale, Trump: Shumë e pamundur
• Masa të reja në zonat turistike të Spanjës, gjoba e rregulla të ashpra për turistët