Ministria e Brendshme e Serbisë: Nuk kemi dhunuar protestues

Mbrëmjen e djeshme në disa qytete të Serbisë u shënuan përplasje dhe incidente gjatë zhvillimit të protestave qytetare. Në qytetin e Novi Sad-it, një grup protestuesish u përfshi në një konfrontim me simpatizantë të Partisë Progresive Serbe (SNS), të cilët ishin mbledhur pranë zyrave të kësaj partie për të mbrojtur objektin. Situata u përshkallëzua kur në drejtim të protestuesve u hodhën mjete piroteknike, ndërsa godina e SNS-së pësoi dëmtime si pasojë e një zjarri.

Përplasje u raportuan edhe në kryeqytetin Beograd, ku në disa zona u regjistruan incidente mes pjesëtarëve të policisë dhe protestuesve.

Ministria e Brendshme serbe ka reaguar pas publikimit të disa pamjeve në rrjetet sociale, duke deklaruar se ato janë shkëputur nga konteksti dhe nuk pasqyrojnë realitetin. Sipas këtij institucioni, forcat e rendit janë sulmuar nga protestuesit me sende të forta si blloqe betoni dhe shishe, duke rrezikuar sigurinë dhe jetën e policëve.

Në deklaratën e saj, ministria i referohet veçanërisht një videoje që tregon një grua duke u dhunuar nga policia, duke mohuar versionin se oficerët kanë ushtruar forcë të pajustifikuar. Ajo thekson se nuk do të lejojë dhunë ndaj efektivëve të saj, as përhapjen e narrativave që sipas saj synojnë të dëmtojnë imazhin e punës së policisë.

LEXONI GJITHASHTU: 

• Kos: Dhuna gjatë protestave në Serbi është thellësisht shqetësuese
• Natë e dhunshme në Serbi, 16 policë të lënduar, reagon Vuçiç: Atentat i shumëfishtë