Ministria e Jashtme e Shqipërisë thirrje Serbisë të tërheqë forcat e armatosura nga kufiri me Kosovën

Ministria për Evropën dhe Punët e Jashtme e Shqipërisë ka reaguar për situatën e krijuar një ditë më parë në Veri të Kosovës.

Përmes një njoftimi për mediat MJEP dënon ‘aktet vandale ku disa individë i vunë zjarrin zyrave të regjistrimit të mjeteve në Zubin Potok’, ndërsa i bën thirrje Serbisë të tërheqë forcat e armatosura nga kufiri me Kosovën.

“Shqipëria është veçanërisht e shqetësuar për dërgimin e forcave të armatosura serbe pranë kufirit me Kosovën dhe mjetet fluturuese ushtarake të cilët fluturojnë afër dhe sipër hapësirës ajrore të Kosovës, të cilat nxisin individët të provokojnë trazira dhe dhunë, si dhe synojnë destabilizimin e Kosovës. Këto akte bien ndesh me marrëveshjet ndërkombëtare, të cilat kanë për synim të sigurojnë rendin dhe stabilitetin në atë pjesë të rajonit.

Ne i bëjmë thirrje Serbisë të tërheqë forcat e armatosura të dërguara pranë kufirit me Kosovën dhe të punojë për çtensionim të menjëhershëm të situatës. Ne i nxisim të gjithë aktorët të tregohen të përmbajtur dhe të drejtohen menjëherë drejt dialogut, si e vetmja mënyrë për të ecur përpara dhe për të zgjidhur çështjet e mbetura pezull me frymën e bashkëpunimit, ndaj të cilave Shqipëria është angazhuar në mënyrë të pakthyeshme, në përpjekjet e saj dypalëshe dhe shumëpalëshe”, thuhet në reagimin e Ministrisë së Jashtme të Shqipërisë.

LEXONI GJITHASHTU:

Kurti: Në bllokimet e Jarinjës dhe Bërnjakut po marrin pjesë njerëz me veprimtari kriminale

Basha thirrje qeverisë të mos heshtë për situatën në Kosovë