Ministrja lituaneze: NATO po provokohet, Turqia në 2015 rrëzoi avionin rus

Ministrja e Mbrojtjes së Lituanisë, Dovilė Šakalienė, ka reaguar pas incidentit të fundit në hapësirën ajrore të Estonisë, duke theksuar se kufijtë lindorë të NATO-s po testohen me qëllim dhe se Aleanca duhet të ketë një qëndrim të qartë dhe vendimtar.

Përmes një reagimi në rrjetet sociale, Šakalienė u shpreh se ngjarja është një tjetër dëshmi se operacioni i përbashkët mbrojtës #EasternSentry është i domosdoshëm dhe i vonuar.

“Kufiri i NATO-s në verilindje po testohet për një arsye. Duhet të tregojmë se e kemi seriozisht,” deklaroi ajo.

Në mënyrë domethënëse, ministrja lituaneze përmendi edhe incidentin e vitit 2015, kur Turqia rrëzoi një avion rus që kishte shkelur hapësirën e saj ajrore. Ajo tha se ky rast duhet të shërbejë si një precedent për mënyrën se si duhet vepruar në situata të ngjashme.

“Turqia dha një shembull para 10 vitesh. Një temë për reflektim,” përfundoi ajo.

Deklarata e saj vjen në një moment tensioni të shtuar në kufijtë lindorë të NATO-s, veçanërisht pas raportimeve për shkelje të përsëritura të hapësirës ajrore nga avionë ushtarakë rusë pranë vendeve baltike.

LEXONI GJITHASHTU:

• Trump: Është problem i madh që vendet e BE-së dhe NATO-s blejnë naftë ruse
• Rama në Bruksel, pritet të takohet me kreun e NATO-s