Misteret e Vatikanit: Kush do të jetë Papa i ardhshëm?

Pas përfundimit të periudhës nëntëditore të zisë (Novendia) dhe funeralit zyrtar të Papa Françeskut, Kisha Katolike po përgatitet për një prej ngjarjeve më të rëndësishme në historinë e saj që është zgjedhja e Papës së ardhshëm.

Konklava do të zhvillohet në Kapelën Sistine, ku Kolegji i Kardinalëve do të mblidhet në kushte të rrepta izolimi për të përzgjedhur liderin e ri shpirtëror të më shumë se 1.3 miliardë besimtarëve katolikë në mbarë botën. Procesi, zhvillohet nën një regjim të rreptë pa telefona, televizione apo kontakte me botën e jashtme.

Prej 252 kardinalëve aktualë, vetëm 138 kanë të drejtë vote, sipas rregullit që përjashton ata mbi moshën 80 vjeç nga votimi.

Pretendentët kryesorë për fronin papnor:

Peter Erdo (Hungari, 72 vjeç)

Kryepeshkopi i Budapestit dhe figurë qendrore në Këshillin Evropian të Peshkopëve. Ai shihet si përfaqësues i konservatorëve europianë. I njohur për qëndrimin e tij kritik ndaj politikave të migracionit dhe për një stil drejtues më juridik dhe i rezervuar.

Reinhard Marx (Gjermani, 71 vjeç)

Një figurë liberale dhe ish-president i konferencës së peshkopëve gjermanë, Marx ka qenë promotori i “rrugës sinodale”, një proces reformash që përfshinte çështje si beqaria, homoseksualiteti dhe roli i grave në kishë. I sfiduar nga konservatorët, ai mbetet një figurë me ndikim.

Marc Ouellet (Kanada, 80 vjeç)

Një nga zyrtarët më të lartë të Vatikanit për më shumë se një dekadë. I konsideruar një nga konservatorët e moderuar, ai ka ndihmuar në përzgjedhjen e peshkopëve gjatë papatit të Benediktit XVI dhe Françeskut. Mosha e tij, megjithatë, është në kufijtë e lejuar për pjesëmarrje.

Pietro Parolin (Itali, 70 vjeç)

Sekretari i Shtetit të Vatikanit që nga viti 2014, Parolin është ndër emrat më të fuqishëm në hierarkinë katolike. Me përvojë diplomatike të gjatë dhe besnik i linjës së Françeskut, ai shihet si një figurë e balancuar mes traditës dhe moderacionit.

Robert Prevost (SHBA, 69 vjeç)

Një nga figurat më të reja në krye të dikastereve të Vatikanit. Me përvojë të gjatë misionare në Peru dhe i afërt me Papa Françeskun, Prevost përfaqëson një brez të ri liderësh të angazhuar globalisht. Kandidatura e tij do të ishte historike, pasi Amerika kurrë nuk ka pasur një Papë.

Robert Sarah (Guinea, 79 vjeç)

Kardinali Sarah, i njohur për stilin e tij tradicional dhe shpirtin liturgjik, është një nga figurat më të vlerësuara nga krahët konservatorë të Kishës. Mbështetës i zellshëm i beqarisë për priftërinjtë dhe i kritik ndaj disa reformave të Françeskut.

Luis Antonio Tagle (Filipine, 67 vjeç)

Një nga figurat më të dashura në Azi, Tagle është konsideruar “Françesku i ardhshëm” për qasjen e tij të butë dhe njerëzore. Me rrënjë kineze dhe përvojë në krye të dikasterit të ungjillëzimit, ai shihet si përfaqësuesi ideal i një Kishe globale, sidomos në Azi dhe Afrikë.

LEXONI GJITHASHTU:

• Ditët e fundit të Papës: Iu bashkua turmave për Pashkë, injoroi këshillën e mjekëve
• Kardinali dom Ernest Simoni-Troshani reagon pas ndarjes nga jeta të Papa Françeskut