Mitropolitët e Korçës dhe Amantias vizitojnë Kryepeshkopin Janullatos në spital

Mitropoliti i Korçës, Hirësi Joani, dhe Mitropoliti i Amantias, Hirësi Nathanaili, kryen këtë të martë një vizitë në spitalin “Evangjelizmos” në Athinë, ku Kryepeshkopi i Tiranës, Durrësit dhe i Gjithë Shqipërisë, Imzot Anastas Janullatos, ndodhet në gjendje kritike që prej datës 3 janar.

Gjatë vizitës, ata u takuan me Doktoreshën Anastasia Kotanidu, Drejtoreshë e Njësisë së Terapisë Intensive, për të shprehur interesimin e Sinodit të Shenjtë të Kishës Orthodhokse Autoqefale të Shqipërisë mbi shëndetin e Kryepeshkopit.

Sipas Kishës Ortodokse, ata falënderuan stafin mjekësor për kujdesin dhe profesionalizmin e treguar në trajtimin e tij.

“Mitropolitët përcollën lutjet e mbarë popullit shqiptar orthodhoks për Kryepiskopin Anastas por edhe për stafin mjekësor, që me integritet dhe profesionalizëm vazhdojnë përpjekjet për rehabilitimin e shëndetit të tij, pavarësisht faktorëve rëndues.

U takuan në Spital edhe me Episkopin e Krujës, Hirësi Anastasin, Atë Spiridhonin dhe Atë Harallambin, të cilët shoqërojnë Kryepiskopin, duke u shprehur atyre solidaritet shpirtëror.

Me rastin e qëndrimit në Athinë, Kryepriftërinjtë e Kishës sonë kryen vizitë edhe tek Kryepiskopi i Athinës dhe i Gjithë Greqisë, Imzot Jeronimi, i cili që në ditët e para vizitoi në spital Kryepiskopin Anastas, dhe ndjek në vazhdimësi ecurinë e shëndetit të tij. I shprehën mirënjohje dhe për të gjithë dashurinë e grigjës së Kishës së Greqisë për Kryepiskopin Anastas, të shprehur nëpërmjet lutjeve të tyre të vazhdueshme”, thuhet në njoftimin e Kishës Ortodokse Autoqefale të Shqipërisë.