Mitsotakis: Greqia mund të përdorë energjinë bërthamore në të ardhmen

Kryeministri grek Kyriakos Mitsotakis tregoi sot se Greqia mund të zhvillojë energji bërthamore në të ardhmen si pjesë e tranzicionit të gjelbër.

Duke folur në një konferencë për tranzicionin energjetik në Athinë, Mitsotakis tha se Greqia “duhet të jetë gati të bashkohet me aleancën bërthamore”.

“Kjo mund të jetë një tronditje për disa që po na dëgjojnë, duke pasur parasysh se Greqia nuk ka përvojë në energjinë bërthamore. Por kur shoh zhvillimin e përgjithshëm të energjisë, nuk shoh një mënyrë që bota të arrijë neutralitetin e karbonit pa energji bërthamore, dhe shoh zhvillime shumë interesante në këtë fushë”, tha ai.

Mitsotakis shtoi se nuk beson se kjo do të ndodhë së shpejti, por se dëshiron që Greqia “të jetë pjesë e bisedës” rreth përdorimit të energjisë bërthamore, raporton “Kathimerini”.

Në të njëjtën kohë, Mitsotakis shprehu shqetësim për përshkallëzimin e luftës midis Izraelit dhe Iranit, duke thënë se Irani nuk mund të ketë armë bërthamore, por theksoi se një zgjidhje mund të arrihet vetëm përmes diplomacisë.

Ai vuri në dukje se situata në Gaza është ende shumë shqetësuese, prandaj fokusi global nuk duhet të kufizohet vetëm te Izraeli dhe Irani.

“Fakti që tani kemi një konflikt midis Izraelit dhe Iranit nuk duhet të na dekurajojë që të theksojmë vazhdimisht nevojën për një armëpushim të menjëhershëm në Gaza dhe që populli i Gazës të ketë qasje të papenguar në ndihmë të konsiderueshme humanitare për të adresuar nevojat e tyre të menjëhershme”, tha ai.