Goditen dy raste të kultivimit të kanabisit në Shkodër, arrestohen dy persona! Ndiqet penalisht kryeplaku i Vuklit

\Policia e Shkodrës ka goditur dy raste të kultivimit të bimëve narkotike në kuadër të operacionit të koduar “Territor i Pastër”, i zhvilluar këtë të shtunë në zonat e Shoshit dhe Kelmendit. Gjatë operacionit u arrestuan dy persona, ndërsa u procedua penalisht kryeplaku i njërit prej fshatrave ku u zbuluan parcelat me kanabis.

Sipas njoftimit zyrtar, në fshatin Ndrejaj, njësia administrative Shosh, shërbimet e Policisë konstatuan 768 bimë të dyshuara narkotike cannabis sativa. Në flagrancë u arrestua 53-vjeçari me inicialet P. M., i cili u kap në parcelën ku dyshohet se kishte kultivuar bimët narkotike. Gjatë kontrollit pranë banesës së tij u sekuestruan edhe 80 kubikë të dyshuar me fidanë cannabis sativa.

Ndërkohë, në fshatin Vukël të njësisë administrative Kelmend, u zbuluan 1.250 bimë të dyshuara cannabis sativa. Në afërsi të parcelës u arrestua në flagrancë 52-vjeçari A. Ç., i dyshuar për veprën penale “Moskallëzimi i krimit”.

Po ashtu, nisi procedimi penal në gjendje të lirë ndaj kryeplakut të fshatit Vukël, shtetasit K. B., 65 vjeç.

Në total, gjatë operacionit u asgjësuan me djegie 2.098 bimë dhe fidanë të dyshuar kanabisi.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme.