Për herë të dytë, prej të hënës, një grup i përbërë nga pesë persona dhe që janë pjesë e komisionit të ngritur me urdhër të drejtorit të përgjithshëm të burgjeve, kanë shkuar në spitalin privat ku mbahet 14-vjeçari, i dyshuari për vrasjen e bashkëmoshatarit të tij në shkollën “Fan Noli”.

Ditën e kaluar, mjeku privat ka zvarritur ekspertët dhe nuk ua ka dorëzuar epikrizën e 14-vjeçarit që mbahet nën masën e arrestit me burg.

Prej orës tetë të mëngjesit bëhet me dije se komisioni i burgjeve, që duhet të tërheqë epikrizën dhe të vendosë për gjendjen e tij, nëse duhet të dërgohet apo jo në institutin e të miturve në Kavajë, vazhdon të qëndrojë në ambientet e spitalit.

Autori po trajtohet për plagët që ka pësuar në dorë gjatë përleshjes me viktimën. I mituri ka kryer një ndërhyrje kirurgjikale për shkak të dëmtimit nga thika.

Prokuroria e ka akuzuar të miturin për dy vepra penale: “Vrasje në rrethana cilësuese” dhe “Prodhimi, mbajtja, blerja apo shitja pa leje e armëve të ftohta”.

Ishte prokurorja dhe gjyqtarja, që më datë 22 nëntor zhvilluan në ambientet e spitalit seancën për masën e sigurisë dhe i caktuan masën “Arrest me burg”.

Ngjarja e rëndë ndodhi ditën e hënë gjatë një përleshjeje fizikemes disa adoleshentëve, 200 metra larg shkollës 9-vjeçare “Fan Noli”.

Auori dhe viktima ishin konfliktuar të premten dhe e vijuan zënkën edhe ditën e hënë.

Autori kishte thirrur një shok të tij, nxënës i shkollës “Fan Noli”. Nga ana tjetër, viktima, Cani, kishte thirrur një shok nga shkolla “Mustafa Qemal Atatürk” në Sauk, me të cilin luante në ekipin U-15 të Dinamos.

Gjatë përplasjes mbeti i plagosur  edhe shoku i viktimës, ndërsa autori mori një plagë aksidentale në parakrah.

Pas ngjarjes, autori u largua me vrap drejt Pazarit të Ri, ku të njohur të tij e çuan me një makinë në një spital privat për mjekim. Policia e arrestoi më pas në ambientet e spitalit privat ku po kurohej.

LEXONI GJITHASHTU:

• “Boshllëk që s’do mbushet kurrë”- Nëna e 14-vjeçarit përlot protestuesit
• “Djali ka 3 ditë që nuk fle”- Prindër te “Fan Noli” përkujtojnë 14-vjeçarin e vrarë