Mjerim në shkollën e Krrabës, xhama të thyer, dritare që nuk hapen, tualetet pa ujë

Banjo pa ujë, dritare pa xhama, mjedis pa higjiene. 25 kilometra larg Sheshit Skënderbej, nxënësit shkollohen si në epokën e Skënderbeut.

Në pamje të parë muret e shkollës japin përshtypjen e një ndërtesë të braktisur, por në fakt në atë godinë studiojnë nxënësit në zonën e Krrabës, nga klasa e parë deri në vitin e tretë gjimnaz.

Ditët me shi janë më të vështirat. Prej vitesh, çfarë bie jashtë, futet brenda në klasë.

“Jemi munduar të vëmë perde, që të paktën të mos futet shiu, ose diçka”, u shpreh një nxënëse e kësaj shkolle.

Në disa klasa të tjera, dritaret as nuk hapen e as nuk mbyllen. Fëmijët kanë treguar kreativitetin e tyre.

“Ja kemi hequr xhamin dhe mund t’ia vendosim prapë, se nuk hapen dritaret”, u shpreh një nxënëse.

Por nuk përfundon me keq. Mungesa e ujit është një tjetër problem për këtë shkollë.

Kemi arritur të sigurojmë një video nga tualetet e shkollës. Kushtet në të cilat ndodhen këto fëmijë, lënë për të dëshiruar. Nxënësit shprehen se nuk i përdorin banjot e shkollës.

“Edhe ujë do dëshironim pak, edhe banjot nuk është se janë shumë të përshtatshme”, tha një nxënëse.

Jashtë kameras, drejtuesit e shkollës tregojnë se prej vitesh kanë kërkuar rikonstruksion në këtë shkollë, por edhe pas tërmetit të 26 nëntorit nuk është vënë dorë.

LEXONI GJITHASHTU:

• Nis viti i ri shkollor në Kosovë nën masa anti-COVID, kufizime edhe për restorantet dhe hotelet