Momentet e 24-vjeçares para vrasjes: Mbërrin në Rinas me të dashurin që e qëlloi

Euronews Albania ka siguruar pamjet e momentit kur 24-vjeçarja palestineze, e cila u gjet e pajetë në një apartament në Tiranë, mbërrin në aeroportin e Rinasit. Në video, ajo shihet nën shoqërinë e të dashurit të saj, 49-vjeçar, i cili dyshohet se është personi që e ka qëlluar për vdekje me thikë.

Sipas pamjeve të regjistruara më 19 shkurt, çifti shfaqet i qetë në aeroport teksa kalon kontrollin e pasaportave, ku ata paraqitën dokumente greke. Pas daljes nga aeroporti, të dy janë drejtuar për në rrugën “Gjon Buzuku” në Tiranë, ku janë akomoduar në një apartament të marrë me qira.

Hetimet tregojnë se më 22 shkurt, 49-vjeçari u largua nga banesa dhe po atë mbrëmje udhëtoi nga Rinasi drejt Greqisë. Policia dyshon se ai ka ushtruar dhunë mbi 24-vjeçaren përpara se ta vriste me thikë, duke e lënë të mbuluar me çarçaf.

Motivi i saktë i krimit mbetet ende i paqartë, ndërsa autoritetet shqiptare po bashkëpunojnë me homologët ndërkombëtarë për të zbardhur plotësisht ngjarjen dhe për të lokalizuar të dyshuarin.