Mori 25 mijë euro t’i ulte dënimin një të dënuari, GJKKO lë në burg avokatin

Gjykata e Posaçme ka lënë  në fuqi masën e “Arrestit në shtëpi” për avokatin Petraq Semani. Ai akuzohet se mori një shumë prej 25 mijë euro nga familjarët e një të dënuari për t’i ulur dënimin me 15 vite burg.

Sipas GJKKO, ndaj avokatit rëndon vepra penale “Ushtrimi i ndikimit të paligjshëm ndaj personave që ushtrojnë funksione publike”.

Ndërkohë shtetasi të cilit avokati i mori para në këmbim të ndikimit të tij te gjyqtarët, është i dënuar me 15 vite burg për të “plagosje të rëndë me dashje, me pasojë vdekjen”.

Hetimet e kryera nga SPAK zbuluan se Semani, në cilësinë e avokatit u ka marrë shtetasve Ll. D. dhe S. D.,  një shumë monetare prej 25 000 euro, pasi i ka premtuar se do ushtrojë ndikim tek gjyqtarët e çështjes, të cilët po shqyrtonin çështjen në ngarkim të shtetasit Ll. D., për favorizimin e tij në masën e dënimit.

Marrja e sasisë prej 9.550 euro, nga avokati, në banesën e shtetasit Ll. D. është regjistruar me audio dhe video nga rrethi familjar dhe shoqëror i të dënuarit. Ndërsa pjesa tjetër e parave i është dhënë avokatit me këste.

“Nga shuma e përfituar në mënyrë të paligjshme, shtetasi nën hetim P. S., i ka kthyer shtetases S. D., shumën  prej 8000 (tetë mijë) Euro, ndërsa  pjesën e mbetur nuk ia ka kthyer”, citohet në vendimin e SPAK.

LEXONI GJITHASHTU:

• Mori 25 mijë euro për të ndikuar te drejtësia, GJKKO “arrest shtëpie” për avokatin
• I akuzuar për vrasje, Kep Arapi kërkon zbutjen e masës së sigurisë. Vendimi i GJKKO