Moska heq masat e vendosura pas rebelimit të ‘Wagner’, Shoigu rishfaqet me ushtarët

Autoritetet ruse kanë hequr masat e sigurisë që u vendosën në Moskë gjatë fundjavës, kur trupat e grupit “Wagner” kërcënuan se do të sulmonin qytetin.

Kryebashkiaku Sergei Sobjanin e njoftoi vendimin përmes një mesazhi në rrjetin “Telegram”, duke falënderuar banorët e kryeqytetit për mirëkuptimin dhe qetësinë e treguar.

Ndërkohë, Komisioni kombëtar i antiterrorit rus deklaroi se situata në vend ishte e qetë, pasi lideri i “Wagner” Jevgjeni Prigozhin ndaloi avancimin e trupave të tij pas një marrëveshjeje me presidentin Putin.

Prigozhin e justifikoi ofensivën e tij duke deklaruar se synonte shkarkimin nga posti të ministrit të Mbrojtjes, Sergei Shoigu, për keqmenaxhim të forcave të armatosura.

Vetë Shoigu u shfaq në televizionin shtetëror rus duke vizituar trupat ruse në Ukrainë. Bëhet fjalë për daljen e tij të parë që nga lëvizja e mercenarëve në fundjavë.

Ministri u shfaq i qetë, një tregues ky i forcës së Rusisë dhe një përpjekje për të treguar se Kremlini mbetet i vendosur për të vijuar atë që e quan “operacioni ushtarak special” në Ukrainë.

Ndërkohë, pas njoftimit të Prigozhin për një mërgim në Bjellorusi janë shtuar zërat se ai mund të tentojë një ofensivë në territorin ukrainas nga ky vend.

LEXONI GJITHASHTU:

• Frikë nga ‘Wagner’, fqinjët e Bjellorusisë përforcojnë sigurinë kufitare
• Kush do e sulmonte Kosovën? Deputeti i Vetëvendosjes flet për armët e kapura në veri