Moti i keq “mbërthen” Evropën, të paktën 5 viktima në Rumani

Pesë persona kanë humbur jetën në lindje të Rumanisë pasi stuhitë me reshje të dendura kanë lënë njerëz të shumtë të bllokuar.

Shërbimet e emergjencave ndërhynë me urgjencë për të shpëtuar 95 persona në zonat e prekura të vendit si Galati dhe Vaslui.

Trupat e pesë viktimave u gjetën në lokalitetet Peçea, Draguseni, Kostaçe Negri dhe Korod, ka bërë të ditur Departamenti për Mbrojtjen civile, që nuk ka dhënë detaje mbi rrethanat e vdekjes.

Ndërkohë, autoritetet në Republikën Çeke kanë nisur ngritjen e barrierave metalike dhe thasëve me rërë, pasi një brez i Evropës qendrore po bëhet gati për motin e keq. Banorët në Pragë janë paralajmëruar të bëhen gati për evakuime.

Meteorologët thonë se një sistem i ulët presioni nga veriu i Italisë pritet të sjellë shira në disa pjesë të kontinentit, përfshirë rajonet kufitare që vendi ndan me Austrinë dhe Gjermaninë, deri në Poloni.

Shirat e dendura dhe rreziku nga përmbytjet parashikohen edhe në Sllovaki e Hungari. Në Poloni është mobilizuar ushtria dhe autoritetet u kanë bërë thirrje banorëve të grumbullojnë ushqime dhe të përgatiten për ndërprerje të energjisë.

Kryeministri Donald Tusk tha se nuk ka nevojë për panik, por shtoi se ka një arsye për të qenë të mobilizuar.

Në Gjermani, shërbimi meteorologjik vendas paralajmëroi për shira të dendura në disa pjesë të vendit, përfshirë Alpet, ku nuk do të mungojnë reshjet e dëborës.

Paralajmërime janë bërë edhe në Austri, ku prej ditësh bien reshje shiu.

LEXONI GJITHASHTU:

• “Çmendet” moti në Itali, rrugët në Avellino kthehen në lumenj të vrullshëm
• Stuhi në Evropën Perëndimore, reshje dhe përmbytje në Gjermani e Belgjikë