“Mu dukën si fishekzjarrë”, shitësi i fruta-perimeve tregon tmerrin në Vlorë

Pas ngjarjes së rëndë që tronditi Vlorën mbrëmjen e së mërkurës, ku u plagosen 2 persona në lagjen “24 Maji”, Euronews Albania ka siguruar një intervistë ekskluzive me njërin prej tyre. Bëhet fjalë për shitësin e fruta perimeve që mori një plumb në këmbë aksidentalisht, Armand Spahiun.

35-vjeçari tregon momentet e para të ngjarjes.

“Unë isha në punën time. Nuk mora vesh asgjë ca ndodhi. unë mendova se ishin fishekzjarre. Pastaj u shtriva në shesh. Kur mbaruan krismat, u ngrita në këmbë, mora një bidon ujë dhe u ula të qetësohesha”, thotë ai.

Armandi tregon se ishte vetë ai që i kërkoi efektivëve ta dërgonin në spital kur kuptoi se ishte plagosur.

“Kur u ula pash që isha plagosur. Mora në telefon një efektiv policie dhe i thash që isha plagosur. Më morën me makinë policie e më çuan për mjekim. Në fillim unë mendova se ishin fishekzjarre. Plagosjen nuk e ndjeva në fillim, pas 10 minutash e ndjeva”, tregon ai.

Në shtëpinë e 35-vjeçarit ka kapluar heshtja. Ajo duket qartë në fytyrat e prindërve të tij. E gjithë ngjarja ishte e frikshme për Armandin, i cili ka vetëm një lutje: “Mesazhi im është vetëm falënderim për Zotin lart që më la të jetoj”.

Rastet si Armandi që janë plagosur apo kanë humbur jetën aksidentalisht gjatë atentateve mafioze janë të shumta. Ata nuk kanë qenë objektiv i autorëve, por janë ndodhur në kohën dhe vendin e gabuar.

LEXONI GJITHASHTU:

• Atentati mafioz në Vlorë| Gazetari Ferhati zbërthen motivet e mundshme të ngjarjes
• Pak pas atentatit në Vlorë, momenti kur qytetarët nxjerrin nga makina të plagosurin