Muzeu i armëve në Gjirokastër, 10 mijë turistë në 2022-shin

Armët relike pjesë e fondit të Muzeut të Armëve në Kalanë e Gjirokastrës tërheqin interesin e vizitorëve.

Muzeu përmban një shumëllojshmëri armësh të modeleve të ndryshme, që nga kohët më të lashta e deri në ditët e sotme. Numri i madh i armëve dhe pajisjeve ushtarake nga Lufta e Parë dhe e Dytë Botërore, kanë interes kryesisht për specialistët.

 “Interesi i vizitorëve të huaj për Muzeun e Armëve është veçanërisht i rëndësisë së madhe sepse ata nëpërmjet  vizitës në muze njihen me armët e përdorura në periudha të ndryshme historike të luftës dhe janë tepër kuriozë në cilat periudha dhe cilat shtete i kanë prodhuar këto armë që janë përdorur,” – u shpreh ciceronia Albana Ismaili.

Krahas armëve trofe, pjesë e veçantë e këtij muzeu janë edhe armët e prodhuara përgjatë periudhave të ndryshme të historisë së Shqipërisë. Armët daton disa shekuj më parë, që nga periudha e strallit, rendi feudal, periudha osmane dhe armët e kohës së Skënderbeut. Këndi i armëve të traditës shqiptare është ndër pjesët më vizituara të muzeut, kryesisht nga turistët e huaj.

 “Është me interes të veçantë sepse pasqyron gjurmë historike të armatimeve të vjetra gjithashtu edhe armët e strallit, të cilat shfaqin interes të veçantë për modelin e tyre. Të cilat janë prodhuar me porosi të familjeve feudale dhe janë unike, nuk ka dy të njëjta për llojin e vet,” – tregoi Ismaili.

Muzeu i armëve u hap në 1971 si Muze kombëtar i armatimeve ku u sollën gjithë armët dhe tipet e tyre të përdorura gjatë Luftës së I dhe të II botërore dhe jo vetëm.

Përgjatë vitit 2022 Muzeu i Armëve u vizitua nga mbi 10 mijë turistë, ndërsa synohet që për këtë vit numri i vizitorëve në mjediset e tij të jetë më i lartë.

LEXONI GJITHASHTU:

• Çatitë me pllaka guri, rikthehen elementët karakteristikë në shtëpitë gjirokastrite
• Muzeu i ‘Luftës së Ftohtë’ në Gjirokastër, mijëra turistë e vizituan gjatë 2022-shit