Naftëtarët hyjnë në ditën e 14-të të grevës, tre përfundojnë në spital

Naftëtarët e Ballshit kanë hyrë në ditën e 14-të të grevës së urisë. Mëngjesin e sotëm, gjendja e tyre shëndetësore është rënduar.

“S’jemi mirë jo! Para pak minutash ishin 3 kolegë drejt spitalit. Morën mjekimin e duhur dhe tani u rikthyen prap në grevë”, shprehet Sokol Dautaj, kreu i Sindikatës së Naftëtarëve.

Por, gjendja e 10- grevistëve  nuk është problemi kryesor i naftëtarëve.

“Askush nuk na ka marrë. Kjo na ka stresuar më shumë. Pamë sot lajmet që mjekët gjetën zgjidhje, pamë që ata në burgje gjetën zgjidhje. Vetëm për naftëtarët nuk e çan kokën njëri”, shton ai.

Sipas kreut të Sindikatës së Naftëtarëve, thotë se Këshilli Sindikal do të mbajë sot një mbledhje për të diskutuar mbi përshkallëzimin e protestës.

“Do mblidhen dhe kolegët që janë jashtë. Në mëngjes do mblidhemi aty merren vendimet e duhura. Ajo është pjesa që është në mbështetje të grevës së urisë dhe ata vendosin”, tha ai.

Naftëtarët e Ballshit nisën grevën e dytë të urisë më 28 shtator, por edhe pas 14 ditësh ata ende nuk kanë marrë një zgjidhje nga Qeveria.