Ndahet nga jeta Franko Fratini, politika shqiptare nderon ish-ministrin italian

Është ndarë nga jeta mëngjesin e kësaj të diele ish-ministri i Jashtëm Italian, Franko Fratini.

Mediet italiane shkruajnë se Fratini nuk ia doli të fitojë betejën me një sëmundje të rëndë nga e cila  vuante prej disa kohësh, duke ndërruar jetë në spitalin Gemelli në Romë.

Franko Fratini njihet si një nga mbështetësit më të mëdhenj të Shqipërisë në 30 vitet e fundit. Përgjatë viteve 2002-2004 dhe 2008-2011, Fratini ishte ministër i Jashtëm i Italisë, ku u dallua mbështetja e madhe për Shqipërinë në proceset demokratike dhe për integrimin në Bashkimin Europian. Fratini mbajti edhe pozicionin e Komisionerit Evropian për Drejtësi dhe Liri në vitet 2004 – 2008 gjatë kohës që Komisioni Europian u drejtua nga Josè Manuel Barroso.

Për kontributin në mbështetje të Shqipërisë, Fratini ka marrë disa vlerësime. Në vitin 2018 ai u nderua nga Presidenti Ilir Meta me dekoratën “Gjergj Kastrioti Skënderbeu”, për rolin që Fratini luajti heqjen e vizave për shqiptarët në Evropë. Në vitin 2012 Franko Fratini u shpall qytetar nderi i Tiranës nga kryebashkiaku i atëhershëm Lulzim Basha.

Kryetari i Partisë së Lirisë, Ilir Meta reagoi në rrjetet sociale për ndarjen nga jeta të Fratinit, duke e cilësuar atë si një humbje të madhe. Sipas Metës me ikjen e Fratinit, Shqipëria ka humbur një mik dhe mbështetës të pakursyer.

LEXONI GJITHASHTU:

• Eksperti: Çështja e Ervis Martinajt, e ngjashme me italianin që inskenoi vdekjen
• Koha për krishtlindje, qytetet italiane mirëpresin qytetarë e turistë