Ndahet nga jeta në Prishtinë gazetarja ukrainase

Gazetarja ukrainase Olga Pridako ka ndërruar jetë këtë të mërkurë në Prishtinë, ku jetonte prej më shumë se dy vitesh bashkë me djalin e saj.

Lajmin e ka konfirmuar Asociacioni i Gazetarëve të Kosovës (AGK), i cili përmes një deklarate për media ka shprehur ngushëllimet për ndarjen nga jeta të gazetares.

“Me dhimbje të thellë, njoftojmë ndarjen nga jeta të gazetares ukrainase Olga Pridako, në moshën 51-vjeçare. Ajo ndërroi jetë në banesën e saj në Prishtinë, ku jetonte së bashku me djalin e saj, Yaroslavin. AGK dhe Qendra Evropiane për Lirinë e Shtypit dhe Medias (ECPMF) shprehin ngushëllimet më të sinqerta për familjen dhe të afërmit e saj,” thuhet në deklaratën e AGK-së.

Pridako ishte pjesëmarrëse në programin “Gazetarët në Rezidencë, në Kosovë,” i cili i mundësoi qëndrimin e saj në vend dhe mbështetje në vijimin e karrierës gazetareske.

“Përkushtimi i saj ndaj gazetarisë dhe integriteti i saj profesional do të mbahen mend dhe do të nderohen nga të gjithë ata që e njohën,” përfundon deklarata e AGK-së.

Humbja e saj ka prekur komunitetin e gazetarëve dhe të gjithë ata që e kanë njohur nga afër.