Ndarja nga jeta e kongresmenit Eliot Engel, nis me një minutë heshtje seanca plenare në Kuvend

Seanca e plenare këtë të enjte ka nisur me një minutë heshtje në nder të kongresmenit amerikan, Eliot Engel i cili u nda nga jeta pak ditë më parë. Ish-kongresisti amerikan, Eliot Engel u nda nga jeta në moshën 79-vjeçare. Ai ishte një nga mbështetësit më të mëdhenj të Kosovës.

Ai ka qenë mbledhësi kryesor i mbështetjes së Kongresit për njohjen e pavarësisë së Kosovës nga Serbia, në vitin 2008. Pas 1 minutë heshtje, seanca në Kuvend vijoj me fjalën e kryeparlamentarit Niko Peleshi i cili lexoi rendin e ditës.

“Eliot Engel ishte mik i madh i shqiptarëve dhe mbështetës i fortë i çështjes sonë kombëtare. I paharruar qoftë kujtimi i tij”, tha Peleshi.

Në vijim të rendit të ditës, do të zhvillohet interpelancë me Kryeministrin Edi Rama, si dhe me zëvendëskryeministren Albana Koçiu, të kërkuara nga deputetët Agron Shehaj dhe Erald Kapri.

Seanca përfshin gjithashtu shqyrtimin e disa projektligjeve, mes të cilave ratifikimi i marrëveshjeve ndërkombëtare në fushën e energjisë, bashkëpunimit teknik dhe mjedisit, si dhe projektligje që lidhen me sektorë të ndryshëm, përfshirë sigurinë dhe administratën publike.

Ndër pikat e rendit të ditës është edhe zgjedhja e kryetarit të Komisionit të Autoritetit të Konkurrencës.