“Ndëshkim kolektiv mizor”, Zyrtari i OKB i kërkon Izraelit të lejojë ndihmat në Gaza

Tom Fletcher, nënsekretari i përgjithshëm i OKB-së për çështjet humanitare dhe koordinatori i ndihmës emergjente, tha se ndërsa pengjet duhet të lirohen dhe nuk duhet të jenë marrë kurrë që në fillim, ligji ndërkombëtar urdhëron që Izraeli të lejojë ndihmën humanitare në Gaza.

“Ndihma dhe jetët e civilëve që ajo shpëton, nuk duhet të jenë kurrë një mjet negociimi”, tha ai në një deklaratë.

“Bllokimi i ndihmës i lë civilët pa ushqim. I lë pa mbështetje mjekësore bazë. I zhvesh nga dinjiteti dhe shpresa. Shkakton një ndëshkim kolektiv mizor. Bllokimi i ndihmës vret.”

Zyra e OKB-së për Koordinimin e Çështjeve Humanitare (OCHA) ka përshkruar mungesa të mëdha të ushqimit, ujit dhe ilaçeve në Gaza, ndërsa shërbimet mjekësore kanë rënë dhe kuzhinat e bamirësisë janë mbyllur për shkak të mungesës së furnizimeve.

Spitalet kanë raportuar se rastet e grave shtatzëna dhe atyre që ushqejnë me gji të kequshqyera po rriten ndjeshëm dhe shumica e të porsalindurve tani lindin nën peshë.

Fletcher theksoi se “lëvizja humanitare është e pavarur, e paanshme dhe neutrale. Ne besojmë se të gjithë civilët janë po aq të denjë për mbrojtje”.

LEXONI GJITHASHTU:

• Senati amerikan nuk voton rezolutën për të bllokuar tarifat globale të Trump
• Aksident në qendër të Tiranës, dy persona të plagosur