Javën e ardhshme do të miratohet Garancia Sovrane për industrinë fasone. Lajmin e bën të ditur Ministri i Financave, Ervin Mete, i cili shton se kreditimi do të ketë kushte më të favorshme se garancia e dhënë gjatë kohës së pandemisë.

“Presim ta kalojmë në qeveri javën tjetër për të përcaktuar detajet, të cilat do të jenë ndoshta edhe më pozitive se sa kanë qenë garancitë sovrane në kohën e pandemisë. Po flasim për një garanci që mbulon rreth 70% marrjen e kredive nga sistemi bankar, për një marzh 1.5 apo 2%, për një “grace period” rreth 9 muaj dhe që besojmë se, qoftë për pjesën e investimeve, qoftë për pjesën e lëndës së parë që ka pasur nevojë sektori, do të jetë ndihmuese”, tha Mete.

Ministri vuri në dukje se sektori i industrisë përpunuese është parë me përparësi për shkak të krizës që kaloi, ku në fund të vitit u rimbursua e gjithë fatura e TVSH-së.

“Për sektorë të veçantë, po i referohem përsëri fasonit meqenëse ka qenë në vëmendje, kemi pasur diskutim të frytshëm besoj për ndërveprimin që ata kanë me fiskun, qoftë me Tatimet, qoftë me Doganat, duke marrë angazhimin që të lehtësohen dhe thjeshtohen procedurat kur vjen puna te rimbursimi i TVSH-së apo në rastet e ndërveprimit për llogaritë e tyre. Duhet theksuar se vitin e kaluar kemi zero rimbursime TVSH-je të prapambetura në të gjithë sektorët e veçanërisht në këta që janë sektorë prioritarë kur vjen puna në trajtimin fiskal të tyre”, tha ministri.

Në Këshillin Ekonomik, ministri Mete risolli në vëmendje rritjen e vlerësimit të Shqipërisë nga agjencia ndërkombëtare e vlerësimit Standard&Poor’s, vlerësim që ndikon në koston kreditimit.

LEXONI GJITHASHTU:

• Rriten kreditë e këqija, në janar niveli arriti në 4.88%
• 3 mld € kredi në 2023/ Në dhjetor u rrit me 435 mln €, kërkesë e shtuar nga biznesi