“Ndotja më e madhe në 100 vite”, Karamuço zbërthen skemën e mbetjeve të rrezikshme

Profesori i kriminalistikës Ervin Karamuço tha në emisionin Now në Euronews Albania se rasti i mbi 2 mijë tonë mbetjesh toksike të kthyera nga Tajlanda në portin e Durrësit përbën ndotjen më të madhe në 100 vite në vend.

Sipas tij, hetimi tregoi se mbetjet ishin shumë të rrezikshme dhe transportimi i tyre ka qenë në vijimësi i shtrirë në kohë dhe nën sytë e autoriteteve.

“Është një ndotje që ka ecur në vijimësi, e papenguar, e pakontrolluar në mënyrë abuzive, nisur nga ky rast edhe historiku i dokumentacionit, këto nuk janë ngarkesat e vetme, këto u kapën, kanë qenë në vijimësi me zyrtarë që kanë mbyllur sytë. Shpërdorimi i detyrës është flagrant, por kjo çështje nisi me një paragjykim shumë të madh. A do a bënte dot Prokuroria e Durrësit këtë hetim, u akuzuan si të paaftë, thanë ta marrë SPAK. Një drejtuese e Prokurorisë së Durrësit dhe një oficere gjyqësore, sot kemi një mori materialesh me analiza të bëra nga laboratorë të huaj dhe sot na del që kjo ngarkesë është shumë e rrezikshme”, tha Karamuço.