Ndryshojnë kreditë, ekspertët: Kredimarrësit në lekë me tribor paguajnë më pak

Banka e Shqipërisë vendosi që të mos të llogarisë dhe publikojë treguesit tribid dhe tribor.

Treguesi tribor, i cili përdoret si referencë nga bankat e nivelit të dytë për depozitat në lekë, do të ketë një efekt edhe për huamarrësit e kredive, të cilët kanë nënshkruar kontrata me interes të bazuar tek ky tregues.

“Heqja nga publikimi nuk ndryshon asgjë për tregun ndërbankar. I vetmi efekt do të jetë për një pjesë të klientëve individualë që kanë marrë kredi mbi bazën e triborit. Tribori ka vite që nuk përdoret tashmë dhe vitet e fundit është hequr dhe nga bankat, pasi diskutimi ka qenë shumë i hershëm”, thotë sekretari i përgjithshëm i Shoqatës së Bankave, Spiro Brumbulli.

Treguesi do të ndërpritet 1 gushtin e këtij viti dhe do të zëvendësohet me yeldin e bonove thesarit.

“Në kushtet e heqjes së këtij treguesi patjetër që duhet zëvendësuar me një tregues tjetër. Klienti, në qoftëse mbush vitin p.sh, në datën 15 gusht dhe e ka pasur kredinë mbi bazën e triborit, banka nuk do t’i gjejë dot tribor, dhe banka do të aplikojë referencën e bonove të thesarit 12 mujore dhe spreadi mbetet i njëjtë, nuk ndryshon, do ndryshojë vetëm norma e referencës, norma bazë”, shprehet eksperti.

Kuotimi tribor njëvjeçar më datë 10 janar ishte 4.2%, ndërkohë që ankandi i fundit i bonove të thesarit kanë një normë 3.4%. Në të tilla kushte, kredimarrësit që kanë nënshkruar kontrata bazuar në këtë tregues, do të paguajnë 0.8% më pak.

“Është edhe favorizues, sepse bonot e thesarit janë më të ulëta sesa tribori. Të gjithë individët sot po të bëjnë ndryshim, fitojnë 0.8%”, thekson Brumbulli.

Për shkak të volumeve modeste të transaksioneve ndërbankare në Shqipëri, ekspertët thonë se këta tregues nuk ishin shume reflektues dhe konkretë si referencë për ndërtimin e normave të interesit dhe të produkteve të tjera financiare.

LEXONI GJITHASHTU:

• Shtohen kreditë e këqija në Shqipëria, dy faktorët kyç që ndikuan
• Ulen kreditë me probleme, vlera e përgjithshme arrin në 35.7 mld lekë