“Në Ballkan, vëmendje e shtuar”, Osmani: Kosova dhe Serbia të ecin me dialogun

Ndryshimet gjeopolitike dhe lufta mes Rusisë dhe Ukrainës e bëjnë më të brishtë sigurinë në rajon. Kështu ka deklaruar ministri i jashtëm i Maqedonisë së Veriut, Bujar Osmani në një intervistë për Kosova Press, ku bën thirrje që Kosova dhe Serbia të avancojnë me procesin e dialogut.

“Inkurajojmë palët që të shfrytëzojnë këto momente të rëndësishme gjeopolitike dhe të avancojnë procesin sepse kohërat dhe gjeopolitika po ndryshojnë dhe nuk po shkojnë në favor të rajonit” është shprehur Osmani. 

Qëndrime këto të cilat vijnë pas deklaratave të presidentit ukrainas Volodymir Zelensky se Rusia po përgatit luftë në Ballkan.

Për këtë arsye Osmani thotë se ndaj Ballkanit duhet një vëmendje e shtuar dhe e veçantë, ndonëse sipas tij nuk pritet destabilizim.

I pyetur për agresionin serb në Banjskë dhe masat e vëna ndaj Kosovës, kryediplomati maqedonas thotë se ajo që ndodhi më 24 shtator kërkon reflektim të Bashkimit Evropian dhe të vendeve të rajonit, në mënyrë që më pas të mund të vazhdohet me zhvillime të tjera.

I pyetur për draft-statutin e asociacionit të komunave me shumicë serbe, kryediplomati maqedonas, njëherësh kryesues i Organizatës për Siguri dhe Bashkëpunim në Evropë tha se është çështje e Kosovës të vendosë për rregullimin e brendshëm.

LEXONI GJITHASHTU:

• Tensionet në Kosovë, reagimet për paralajmërimin e Zelenskyt
• Kosova kërkon ndihmë nga rajoni për hetimet e sulmit në Banjskë