“Serbët na kërcënuan”! Flet sipërmarrësi që vendosi logot e FSK në Times Square

Sulmi terrorist që ndodhi të dielën ndaj Policisë së Kosovës në veri, ku mbeti i vrarë rreshteri Afrim Bunjkau dhe u plagos një tjetër, ka nxitur reagime të shumta. Në mesin e këtyre reagimeve pati shumë falënderime për pjesëtarët e Policisë së Kosovës për punën e tyre profesionale.

Në shenjë falënderimi për Policinë e Kosovës, mbrëmë në sheshin “Times Square” në New York, në ekranin gjigand është shfaqur logo e policisë bashkë me atë të UÇK-së dhe FSK-së.

E gjithë kjo është realizuar nga Dren Deva nga Mitrovica dhe kompania e tij.

Në një intervistë për Euronews Albania, biznesmeni shqiptaro-amerikan tregoi se ka marrë reagime të shumta përgëzimi në rrjetet sociale nga shqiptarët në Amerikë, Evropë dhe Kosovë, por edhe kërcënime nga komuniteti serb.

“Reagimet kanë qenë të mëdha gjithandej, edhe nga diaspora shqiptare në Amerikë, Evropë dhe nga Kosova, kemi marrë shumë “share” në rrjetet sociale. Kemi marrë reagime edhe negative nga Serbia që kanë qenë të ashpra ndaj nesh, edhe kërcënime, se pse janë shfaqur ato foto dhe pse është logoja e policisë së Kosovës në Nju Jork”, tregoi sipërmarrësi.

LEXONI GJITHASHTU:

• Ish-zv/ministri i Jashtëm i Kosovës: Ishte akt terrorist, Serbia të sanksionohet…
• Përplasjet ne veri të Kosovës, kryetari i Preshevës: Jam i stresuar dhe i mërzitur