Në Tiranë nis Plug and Play Tirana Expo, festivali që bashkon vizionarët

Në Tiranë ka nisur Plug and Play Tirana Expo, eventi dyditor që shënon kulmin e programit akselerues të parë të Plug and Play në Shqipëri. Panairi, që zhvillohet më 16 dhe 17 tetor në Piramidën e Tiranës, synon të lidhë ekosistemin shqiptar të startup-eve me rrjetet më të mëdha të inovacionit dhe investimeve në botë.

Eventi organizohet nga Plug and Play Tirana, me mbështetjen e Fondacionit Shqiptaro-Amerikan për Zhvillim (AADF), në bashkëpunim me IDEMIA SMART IDENTITY by In Groupe, Bashkinë e Tiranës, Piramidën dhe Innovation Hub.

Në ceremoninë hapëse morën pjesë Anuela Ristani, nënkryetare e Bashkisë së Tiranës, Seena Amidi, partner menaxhues për rajonin EMEA në Plug and Play, dhe Michael D. Granoff, kryetar i Bordit të Drejtorëve të AADF.
Pas fjalimeve zyrtare, u zhvillua edhe ceremonia e diplomimit të startup-eve pjesëmarrëse, të cilat kanë kaluar me sukses programin akselerues dhe janë gati për të konkurruar në tregjet ndërkombëtare.

Nga 22 startup-e pjesëmarrëse, 10 do të vazhdojnë udhëtimin e tyre për 6 javë në Silicon Valley, ku do të kenë mundësi të prezantohen para investitorëve globalë dhe të zgjerojnë bashkëpunimet ndërkombëtare.

Në Plug and Play Tirana Expo po marrin pjesë rreth 140 investitorë ndërkombëtarë nga kompani si Mastercard, Visa, Raiffeisen Bank, Air France, Bosch, BNP Paribas, ExxonMobil e shumë të tjera, ndërsa folës nga mbi 20 shtete ndajnë përvojat e tyre në panele mbi inteligjencën artificiale, fintech, qëndrueshmërinë, mobilitetin, kibernetikën, agritech, medtech dhe edtech.

Piramida e Tiranës është shndërruar për dy ditë në një festival idesh dhe teknologjie, me shëtitje inovacioni, demonstrime live, workshope dhe sesione rrjetëzimi që kthejnë kontaktet në mundësi bashkëpunimi reale.
Eventi do të mbyllet me një after-party, që simbolizon frymën e bashkimit dhe të krijimit të një ekosistemi të gjallë inovacioni në Ballkan.

Plug and Play Tirana Expo sjell në Shqipëri energjinë e Silicon Valley dhe shënon një hap të rëndësishëm drejt pozicionimit të Tiranës si një qendër e re rajonale për startup-et dhe teknologjinë.