Në Zveçan nuk votoi askush, dështimi i procesit të shkarkimit të kryetarëve në Veri

Kryetar i KQZ-së në Kosovë, Kreshnik Radoniçi, tha se referendumi i të dielës për shkarkimin e kryetarëve të komunave në veri të Kosovës dështoi.

Shkak për këtë u bë mospjesëmarrja së qytetarëve në votime, ku në Zveçan nuk u regjistrua asnjë votues.

“Të 23 qendrat e votimit janë mbyllur në orën 19:00, sipas të dhënave që kemi pranuar në këto katër komuna, numri i qytetarëve që kanë votuar në procesin e votimit për apo kundër largimit të kryetarëve nga funksioni i tyre është si në vijim:

Leposaviç 124 votues, Zubin Potok 18 votues, Zveçan nuk ka votuar asnjë votues dhe në Mitrovicën e Veriut 111 votues.

Nuk kanë votuar shumica e votuesve të regjistruar, pra nuk është arritur 50% plus 1 i domosdoshëm, prandaj konstatojmë se iniciativa e qytetare për largimin e kryetarëve ka dështuar”, tha Radoniçi në një konferencë të thirrur për media pas mbylljes së votimeve.

Presidentja e Kosovës, Vjosa Osmani, tha se mospjesëmarrja e serbëve në veri në votime u bë për shkak të presionit nga Beogradi.

Osmani shtoi se Vuçiç shkeli fjalën që u kishte dhënë partnerëve ndërkombëtarë.

“Kosova i dha qytetarëve të komunave të veriut mundësinë që t’i largojnë kryetarët aktualë dhe t’i zgjedhin kryetarët e rinj. Qytetarët në masë të madhe nuk e shfrytëzuan këtë mundësi. Për fat të keq, kjo kryesisht ndodhi për shkak të presionit të Beogradit, të ekzekutuar nga Lista Serbe dhe strukturat ilegale kriminale. Edhe njëherë, Serbia kreu ndërhyrje të paligjshme në një proces zgjedhor të një shteti tjetër. Edhe njëherë, Vuçiçi shkeli fjalën që ua kishte dhënë partnerëve ndërkombëtarë”, tha Osmani.

LEXONI GJITHASHTU:

• Osmani dhe Vuçiç përballen në OKB, sot seancë për Kosovën në Këshillin e Sigurimit
• Kurti pas dështimit të referendumit: Kryetarët e komunave të ushtrojnë detyrën