Nëse qeveria nuk rihapet, SHBA-t do të ulin trafikun ajror në 40 aeroporte

Sekretari i Transportit i SHBA-së, Sean Duffy, paralajmëroi një ulje prej 10% të fluturimeve në 40 aeroporte kryesore të SHBA-së, duke përmendur shqetësime për sigurinë e kontrollit të trafikut ajror, ndërsa mbyllja e qeverisë arriti në ditën rekord të 36-të.

Reduktimet e fluturimeve do të jenë graduale, duke filluar nga 4% e fluturimeve vendase të premten, duke u rritur më pas në 5% të shtunën dhe 6% të dielën, përpara se të arrijnë në 10% javën tjetër.

Sipas sekretarit, shkurtimet mund të anulohen nëse demokratët bien dakord që të rihapin qeverinë, ndërsa theksoi se udhëtimi ajror është ende i sigurt dhe vendimi për anulimin e fluturimeve po merret për të ruajtur sigurinë dhe efikasitetin.

Mbyllja, më e gjata në historinë e SHBA-së, ka detyruar 13,000 kontrollorë të trafikut ajror dhe 50,000 agjentë të Administratës së Sigurisë së Transportit të punojnë pa pagesë.

“Është e pazakontë, ashtu siç është e pazakontë mbyllja, ashtu siç është e pazakontë fakti që kontrollorët tanë nuk janë paguar për një muaj”, tha shefi i Administratës Federale të Aviacionit (FAA), Bryan Bedford në një takim informues me Sekretarin e Transportit Duffy të mërkurën.

Dhjetëra mijëra fluturime janë shtyrë që nga fillimi i mbylljes për shkak të mungesave të përhapura të kontrollit të trafikut ajror. Kompanitë ajrore thonë se të paktën 3.2 milionë udhëtarë janë prekur tashmë nga mungesat e kontrollit të trafikut ajror.

Administrata Trump është përpjekur të rrisë presionin mbi demokratët për t’i dhënë fund mbylljes dhe ka ngritur gjithnjë e më shumë shqetësimin për ndërprerje dramatike të aviacionit për t’i detyruar ata të votojnë për rihapjen e qeverisë.

LEXONI GJITHASHTU:

• SHBA kërcënon të tërheqë mbështetjen për forcën paqeruajtëse të OKB-së në Abyei
• Putin: Nëse SHBA rifillon testet bërthamore, do të veprojmë edhe ne