Nesër rikthehet transporti publik në Prishtinë

Ndërmarrja Publike Komunale “Trafiku Urban” ka njoftuar këtë të martë se nga 3 dhjetori do të rifillojë shërbimi i transportit publik në Prishtinë. Vendimi është marrë pasi Ministria e Financave ka filluar alokimin e pjesshëm të mjeteve financiare në vlerë prej 28 milionë euro, të cilat vijnë nga bartja e buxhetit të vitit 2024.

Trafiku Urban shprehu keqardhje për vështirësitë që qytetarët kanë përjetuar gjatë ndërprerjes dhe i falënderoi për mirëkuptimin e treguar.

“Të nderuar qytetarë, Pas fillimit të alokimit të mjeteve nga Ministria e Financave dhe pagesës së faturave nga Komuna e Prishtinës, N.P.K. “Trafiku Urban” SHA ju njofton se nga nesër, më datë 03 dhjetor 2025, do të rifillojë ofrimin e shërbimit të transportit publik.

Gjatë ditëve të fundit, ndërprerja e transportit ka qenë e pashmangshme për shkak të pamundësisë financiare të krijuar nga mospagesa e detyrimeve të Komunës ndaj ndërmarrjes.

Shprehim keqardhje të sinqertë për vështirësitë me të cilat qytetarët janë detyruar të përballen gjatë këtyre ditëve pa shërbimin e transportit publik dhe i falënderojmë për mirëkuptimin e treguar”, thuhet në njoftim.

Kryetari i Prishtinës, Përparim Rama tha se ky është një lajm i mirë për qytetarët dhe punëtorët e Kryeqytetit, ndërsa bëri të ditur se Drejtoria e Financave do të punojë jashtë orarit për të përshpejtuar procesimin e pagesave.

Sipas tij, komuna do të vazhdojë me realizimin e pagesave në përputhje me ritmin e alokimit nga Ministria e Financave, ndërsa pret që shumë shpejt të përfundojë transferimi i plotë i shumës prej 28 milionë eurosh.

LEXONI GJITHASHTU:

• Kush ka të drejtë Rama apo GJKKO? Beçi sqaron vendimin e Kushtetueses
• “Balluku nuk duhet të pezullohej”, avokat Rumano: Të zgjedhurit bëjnë përjashtim…