Netanyahu: Izraeli nuk ka pasur kurrë më parë një mik si Trump, fat i madh

Kryeministri izraelit, Benjamin Netanyahu e vlerësoi presidentin e SHBA-së Donald Trump ndërsa hynte në Mar-a-Lago për takimin e tyre të hënën. Netanyahu u shpreh se Trump është një mik i Izraelit teksa theksoi se është një fat i madh për vendin e tij.

“Do ta them përsëri e përsëri e përsëri. Ne kurrë nuk kemi pasur një mik si Presidenti Trump në Shtëpinë e Bardhë. As afër nuk është”, u tha Netanyahu gazetarëve.

“Mendoj se Izraeli është shumë i bekuar që ka Presidentin Trump në krye të Shteteve të Bashkuara, dhe do të thoja se në krye të botës së lirë në këtë kohë”, shtoi Netanyahu.

“Mendoj se nuk është thjesht fati i madh i Izraelit. Mendoj se është fati i madh i botës.”

Trump gjithashtu vlerësoi marrëdhënien e tyre të shkëlqyer, duke argumentuar se Netanyahu është një burrë i fortë që e ka udhëhequr Izraelin të jetë më i fortë se kurrë.