Netanyahu: Një marrëveshje me Sirinë është e mundur, por kërkohet…

Kryeministri izraelit Benjamin Netanyahu ka deklaruar se një marrëveshje me Sirinë është e arritshme, duke theksuar se Izraeli pret nga autoritetet siriane krijimin e një zone tampon të çmilitarizuar që do të shtrihej nga Damasku deri në zonën e Jabal al-Sheikh, territor që aktualisht kontrollohet nga Izraeli.

Deklaratat e tij erdhën një ditë pasi Presidenti amerikan Donald Trump shprehu dëshirën që Siria dhe Izraeli të ndërtojnë “një marrëdhënie të gjatë dhe të begatë”. Bisedimet për një marrëveshje sigurie mes dy vendeve kanë vazhduar prej muajsh, por progresi ka qenë i kufizuar në javët e fundit.

Siria vazhdon të mos e njohë zyrtarisht Izraelin, i cili vitin e kaluar ka zgjeruar prani të mëtejshme ushtarake në territor sirian. Izraeli pushtoi Lartësitë e Golanit në luftën e vitit 1967 dhe më pas i aneksoi ato, një veprim i njohur vetëm nga Shtetet e Bashkuara dhe i kundërshtuar nga shumica e komunitetit ndërkombëtar. Pas rrëzimit të ish-presidentit sirian Bashar al-Assad në dhjetor 2024, Izraeli shkeli marrëveshjen e vitit 1974 dhe u zgjerua edhe më thellë brenda territorit sirian, duke përfshirë edhe zonën strategjike të Jabal al-Sheikh.

Ndërkohë, sulmet izraelite ndaj objektivave në Siri kanë vazhduar. Së fundmi, një bastisje ajrore vrau 13 persona në qytetin Beit Jinn, pavarësisht deklarimeve të qeverisë së re siriane se nuk kërkon konflikt të ri.

Në këtë sfond tensionesh, Netanyahu tha se pritet që Siria të pranojë një zonë të çmilitarizuar që mbulon qasjet drejt Malit Hermon dhe majës së tij, duke e cilësuar këtë si kërkesë themelore të sigurisë së Izraelit. Ai i bëri komentet gjatë një vizite te ushtarët e plagosur në Izraelin qendror.