New York përkujton 11 Shtatorin, 24 vite nga sulmi tragjik

Më 11 shtator, qyteti i New York ndalet për të përkujtuar viktimat e sulmeve terroriste të vitit 2001, në një nga ditët më të errëta të historisë moderne amerikane. Ceremoni të shumta përkujtimore u mbajtën sot në të gjithë qytetin, ndërsa në Memorialin e 11 Shtatorit në qendër të Manhattanit, familjarët e viktimave vendosën lule dhe lexuan emrat e rreth 3 000 personave që humbën jetën atë ditë.

Prej mëngjesit herët, pjesëtarë të familjeve, përfaqësues të institucioneve dhe të mbijetuar të sulmeve u mblodhën në vendin ku dikur qëndronin Kullat Binjake të Qendrës Botërore të Tregtisë. Ceremonia e përvitshme e përkujtimit u zhvillua në formë të mbyllur për publikun, me një atmosferë solemne dhe në heshtje të thellë. Ndërkohë, Memoriali mbeti i hapur për vizitorët vetëm pas orës 15:00, deri në mesnatë, ndërsa Muzeu i 11 Shtatorit qëndroi i mbyllur për publikun gjatë gjithë ditës për shkak të ceremonive të brendshme.

Në mbarë Shtetet e Bashkuara, kjo ditë nuk njihet si festë kombëtare, por përkujtohet me solemnitet të lartë. Flamujt në të gjitha institucionet u ulën në gjysmë shtize, ndërsa presidenti i SHBA shpalli një moment kombëtar heshtjeje në orën 08:46 të mëngjesit, koha kur avioni i parë u përplas në Kullën Veriore të Qendrës Botërore të Tregtisë. Ceremoni të ngjashme u zhvilluan edhe në kisha të ndryshme në zonat e goditura nga sulmet, ku qytetarë dhe drejtues lokalë u bashkuan në lutje dhe reflektim.

Më 11 shtator 2001, katër avionë pasagjerësh u rrëmbyen nga anëtarë të rrjetit terrorist Al-Kaeda. Dy prej tyre u përplasën në Kullat Binjake në Nju Jork, një tjetër goditi Pentagonin në Uashington, ndërsa avioni i katërt u rrëzua në një fushë në Pensilvani, pasi pasagjerët ndërhynë dhe parandaluan një goditje të mundshme ndaj një objektivi tjetër në kryeqytet.

Edhe pse kanë kaluar 24 vite nga ajo ditë, kujtimi i viktimave dhe pasojat e asaj tragjedie mbeten të gjalla në ndërgjegjen kolektive të amerikanëve dhe të gjithë botës. Për shumë prej atyre që humbën të afërmit e tyre, kjo është një ditë dhimbjeje të thellë, por edhe një moment për të rikujtuar forcën dhe qëndresën përballë së keqes.

LEXONI GJITHASHTU:

• Të shtëna me armë zjarri në SHBA: Qëllohet aleati i Trump
• Trump distancon SHBA-në nga sulmi i pafatizraelit ndajaleatit të ngushtë