Nga janari 2026 edhe djemtë do të vaksinohen kundër HPV

Nga janari i vitit 2026 edhe djemtë do të vaksinohen kundër virusit të papilomës, i cili është shkaktar i kancerit në qafën e mitrës për gratë. Ekspertët e ISHP-së janë të mendimit se pas 5 viteve nga aplikimi i kësaj vaksine te vajzat 13-vjeçare, është koha që ta bëjnë edhe djemtë e së njëjtës moshë.

“Studimet e fundit tregojnë se 1 në 3 burra mbi moshën 15 vjeç janë të infektuar me të paktën një variant të virusit gjenital human papilloma (HPV) dhe 1 në 5 janë të infektuar me një ose më shumë nga variantet që njihen me rrezik të lartë për të shkaktuar kancerin e qafës së mitrës,” – shprehet Rovena Daja, specialiste në ISHP.

Gjatë 5 viteve të fundit, 45.000 vajza të moshës 13–20 vjeç kanë aplikuar vaksinën kundër virusit HPV. 10.000 prej tyre janë vaksinuar vetëm këtë vit.