Nga sot hiqen oraret e lëvizjeve në të gjitha zonat, hapen kufijtë tokësorë, kopshtet dhe çerdhet

Duke nisur nga dita e sotme kufizimi i orarit të lëvizjes do të hiqet si për njerëzit ashtu edhe për gjitha bizneset në të gjitha zonat e vendit.

Kopshtet dhe çerdhet do të rihapen sot për të mirëpritur të vegjlit, ditë që përkon edhe me festën e tyre të 1 Qershorit.

Por tek prindërit ekziston ende frika nga rreziku i infektimit nga coronavirus, edhe disa thonë se nuk kanë zgjidhje tjetër, ndërsa të tjerë për shkak të kësaj frike nuk do t’i çojnë fëmijët në çerdhe e kopshte.

Në masat lehtësuese që nisin nga sot janë dhe hapja e kufijve tokësorë pa detyrim vetë karantinimi, përveç rasteve kur vendoset nga autoritetet shëndetësore.

Gjithashtu, sot do të hapet dhe plazhi për hapësirat e hoteleve, ndërsa zonat publike do të jenë të hapura nga 6 qershori.

Ministri i Turizmit, Blendi Klosi gjatë një takimi me operatorët turistik në Vlorë ditën e djeshme publikoi mënyrën e re të aplikimit që duhet të bëjnë bizneset e shërbimit për të vijuar aktivitetin e tyre.

Z. Klosi njoftoi se sezoni këtë vit do të zgjatet deri më 15 nëntor. Ministri theksoi se kohëzgjatja e sezonit bëhet për t’u dhënë mundësi operatorëve turistikë që të balancojnë humbjen e kohës nga pandemia e COVID-19.