Nis gjyqi në themel, Veliaj përfaqësohet nga Ndreca! Kryebashkiaku: Po lexoj dosjen në qeli

Ka nisur këtë të mërkurë seanca e radhës në themel në ngarkim të Erion Veliaj dhe personave të tjerë nën hetim.

Kjo është seanca e tretë që zhvillohet në themel, ndërsa në seancën e fundit të mbajtur më 24 mars u bë legjitimimi i avokatit mbrojtës, Plarent Ndreca.

Edhe në këtë seancë, Veliaj nuk është paraqitur personalisht në sallën e gjyqit, por përfaqësohet nga avokati i tij mbrojtës, Ndreca.

Nga ana tjetër, SPAK përfaqësohet nga dy prokurorët, Ols Dado dhe Altin Dumani.

Veliaj ka depozituar një deklaratë për mosparaqitjen e tij, duke kërkuar që të përfaqësohet në këtë fazë nga avokati Ndreca.

Në seancë është e pranishme edhe avokatja Valentina Teodoresku.

Sipas informacionit, Veliaj i ka dërguar një shkresë gjykatës, ku bën me dije se është duke shqyrtuar dosjen që i është vënë në dispozicion në IEVP Durrës dhe se në ditët në vijim pritet të paraqitet personalisht në seancë.